Svindeltrendar sommaren 2026 – slik unngår du å bli lurt

Sommaren er høgsesong for ferie, festivalar og reiser, men også for digitale svindlarar. Kvart år ser Nasjonal kommunikasjonsmyndighet (Nkom) nye metodar som blir tekne i bruk for å lura folk, og i den nyaste artikkelen «Svindeltrender sommer 2026» peikar dei på fleire svindelformer som alle bør vera merksame på.

Voss Fiber ynskjer å bidra til ein trygg digital kvardag. Difor deler me dei viktigaste råda frå Nkom, saman med nokre enkle tips som kan hjelpa deg å unngå svindel.

Svindeltelefonar frå utanlandske nummer

Ifølgje Nasjonal kommunikasjonsmyndighet har svindlarane den siste tida i aukande grad teke i bruk utanlandske telefonnummer, særleg danske nummer. Dei kan utgje seg for å representera banken din, Klarna eller andre kjende verksemder for å få deg til å oppgje personlege opplysningar eller logga inn med BankID.

Dersom du får ein uventa telefon om pengar, BankID eller innlogging, bør du leggja på og kontakta verksemda gjennom dei offisielle kanalane.

SMS-ar som ser ekte ut

SMS-svindel er framleis ei av dei mest brukte metodane. Meldingar kan sjå ut til å koma frå Posten, Skatteetaten, Vegvesenet eller andre kjende aktørar, men inneheld lenkjer til falske nettsider.

Klikk ikkje på lenkjer i uventa meldingar. Opna heller nettlesaren og gå direkte til den offisielle nettsida.

Ver varsam når du skannar QR-kodar

Nkom peikar også på ein auke i såkalla quishing, der falske QR-kodar blir brukte for å senda deg til svindelsider. Dette kan skje på parkeringsautomatar, plakatar eller andre offentlege stader.

Ver ekstra merksam dersom ein QR-kode ser ut til å vera limt over ein annan eller plassert på ein uvanleg måte.

Investeringstilbod som verkar for gode til å vera sanne

Svindlarar lokkar ofte med raske gevinstar og sikker avkastning. Dei nyttar stadig meir avanserte metodar, mellom anna kunstig intelligens, for å framstå truverdige.

Gjer alltid grundige undersøkingar før du investerer pengar, og ver skeptisk til tilbod som lovar høg gevinst utan risiko.

Kjøp billettar frå seriøse aktørar

Festivalar og konsertar høyrer sommaren til, men det gjer dessverre også falske billettar.

Kjøp billettar frå den offisielle arrangøren eller autoriserte billettleverandørar. Ver ekstra varsam dersom nokon ønskjer betaling via ukjende løysingar eller sel billettar langt under marknadspris.

Råd som gjer deg tryggare

Del aldri BankID, passord eller eingongskodar med andre.
Ver skeptisk dersom nokon skaper hastverk eller pressar deg til å handla raskt.
Kontroller alltid avsendar før du klikkar på lenkjer eller opnar vedlegg.
Kontakt verksemda direkte dersom du er usikker på om ei melding eller oppringing er ekte.
Snakk gjerne med familie og vener om nye svindelmetodar, kunnskap er det beste forsvaret.

Denne artikkelen byggjer på informasjon frå Nasjonal kommunikasjonsmyndighet (Nkom) og deira oversikt over dei viktigaste svindeltrendane sommaren 2026.

Voss Fiber ynskjer deg ein trygg og god sumar

Me jobbar kvar dag for å levera trygge og stabile tenester. Like viktig er det at me saman bidreg til å gjera den digitale kvardagen sikrare. Litt ekstra merksemd kan vera nok til å stoppa eit svindelforsøk før det får konsekvensar.

Me ynskjer alle kundane våre ein trygg, god og svindelfri sommar.